សេចក្តីបរិសុទ្ធនៃពុទ្ធបញ្ញា និងគារវធម៌ចំពោះព្រះរតនត្រ័យ

 សេចក្តីបរិសុទ្ធនៃពុទ្ធបញ្ញា និងគារវធម៌ចំពោះព្រះរតនត្រ័យ

​តាមគន្លងប្រពៃណីនៃព្រះពុទ្ធសាសនាថេរវាទ "ព្រះបរមនិព្វាន" មិនមែនជាធម៌ដែលបុគ្គលអាចឈ្វេងយល់ល់បានដោយត្រឹមតែការស្មាន ឬតាមអត្តនោមតិ និងចំណង់ចំណូលចិត្តផ្ទាល់ខ្លួននោះឡើយ។ ការដឹងច្បាស់នូវសច្ចធម៌ ត្រូវតែមានឫសគល់ចេញពី ព្រះត្រៃបិដក អដ្ឋកថា និងដីកា ដែលជាផែនទីចង្អុលផ្លូវដ៏ត្រឹមត្រូវបំផុត។ បុគ្គលទាំងឡាយណាដែលប្រកាសខ្លួនថាជាអ្នកត្រាស់ដឹង ប៉ុន្តែបែរជាមើលងាយមាក់ងាយដល់ព្រះពុទ្ធដីកា ឬបដិសេធមាគ៌ាក្នុងគម្ពីរវិសុទ្ធិមគ្គ បុគ្គលនោះឯងមិនមែនជាអ្នកត្រាស់ដឹងតាមគន្លងព្រះសម្មាសម្ពុទ្ធឡើយ។

​ជាការពិតណាស់ តាំងពីសម័យបុរាណកាល មុនការត្រាស់ដឹងនៃព្រះសព្វញ្ញូពុទ្ធ មានទស្សនវិទូ និងអ្នកស្វែងរកសន្តិភាពជាច្រើន បានពោលរៀបរាប់អំពីនិព្វាន មោក្ខធម៌ បរមត្ថសច្ចៈ សីល សមាធិ និងបញ្ញា។ ប៉ុន្តែ ទោះជាយ៉ាងណាក៏ដោយ មានតែព្រះធម៌វិន័យរបស់ព្រះអង្គតែមួយគត់ ដែលមានលក្ខណៈវិសេសវិសាល បរិបូរណ៍ និងមានសភាពល្អ​ហ្មត់ចត់បំផុត។ ហេតុដូច្នេះហើយ ទើបព្រះអរហន្តសាវ័កគ្រប់ព្រះអង្គ និងគ្រូអាចារ្យដែលមានសម្មាទិដ្ឋិ តែងតែសម្តែងនូវសេចក្តីគោរពកោតក្រែងបំផុតចំពោះរាល់គ្រប់តួអក្ខរៈក្នុងព្រះត្រៃបិដក។ ប្រសិនបើមានចំណុចណាមួយដែលយើងមើលទៅឃើញថាមិនច្បាស់លាស់ នោះចូរដឹងចុះថា វាគឺជាកំហុសនៃបញ្ញាដ៏ទន់ខ្សោយរបស់យើង មិនមែនជាកំហុសរបស់ព្រះធម៌ឡើយ។

​ក្នុងយុគសម័យបច្ចុប្បន្ន មានក្រុមមនុស្សខ្លះបានយកពាក្យពេចន៍ ឬវិធីប្រតិបត្តិក្នុងពុទ្ធសាសនា មកបំប្លែងដើម្បីតែផលប្រយោជន៍ និងសេចក្តីសុខក្នុងលោកិយ។ ទោះបីជាវិធីសាស្ត្រទាំងនោះអាចផ្តល់នូវភាពធូរស្រាលក្នុងចិត្តបានមួយគ្រាក៏ដោយ ប៉ុន្តែយើងត្រូវស្គាល់ឱ្យច្បាស់ថា នោះគ្រាន់តែជាការបកស្រាយតាមបែបទស្សនវិជ្ជាមនុស្សលោក ឬការលាយឡំជាមួយលទ្ធិដទៃប៉ុណ្ណោះ វាមិនមែនជាមាគ៌ាដ៏បរិសុទ្ធដែលព្រះអង្គទ្រង់បានត្រាស់សម្តែងទុកឡើយ។ ព្រះនិព្វានពិតប្រាកដ អាចសម្រេចទៅបានលុះត្រាតែមានសេចក្តីជ្រះថ្លាឥតរង្គោះរង្គើចំពោះព្រះរតនត្រ័យ និងការប្រតិបត្តិដែលស្របតាមគម្ពីរដើមតែប៉ុណ្ណោះ។

​ការត្រាស់ដឹងដ៏បរិសុទ្ធតាម​ពុទ្ធសាសនា​ថេរវាទ គឺជាជីវិតដែលប្រកបដោយ "គារវធម៌" យ៉ាងជ្រាលជ្រៅ មានវិន័យតឹងរឹង និងការដើរតាមគន្លងធម៌យ៉ាងខ្ជាប់ខ្ជួន។ វាគឺជាការរួមបញ្ចូលគ្នារវាងការសក្ការៈចំពោះព្រះរតនត្រ័យ ការគោរពប្រតិបត្តិតាមព្រះពុទ្ធដីកា សេចក្តីកោតក្រែងចំពោះព្រះសង្ឃសាវ័ក រួមជាមួយនឹងការដឹងគុណចំពោះមាតាបិតា។

កាលបើបញ្ញាបានចាក់ធ្លុះដឹងច្បាស់នូវ អនិច្ចំ ទុក្ខំ និងអនត្តា នៃរូប និងនាម នោះសេចក្តីជ្រះថ្លា និងកតញ្ញុតាធម៌ចំពោះព្រះរតនត្រ័យ នឹងរឹតតែរីកដុះដាលឡើងកាន់តែខ្លាំង។ ការយល់ដឹងដ៏ត្រឹមត្រូវនេះហើយ ដែលជាបង្អែកនៃសទ្ធាដ៏មាំមួន ជាពន្លឺនៃសីលធម៌ និងជាមាគ៌ាឆ្ពោះទៅកាន់ព្រះនិព្វាន ដែលប្រាសចាកពីអត្តនោមតិ ការជាប់ជំពាក់ ឬការធ្វើឱ្យសាបរលាបដល់ព្រះពុទ្ធសាសនា។

#សមាធិ #Meditation #កម្ពុជា #cambodia #សុខភាពចិត្ត #HunKhamra #Buddhism #International #Mentalhealth