បឋមគោធគរុសូត្រ (បុគ្គល ៤ ពួកក្នុងលោក)

[៤៤] បឋមគោធគរុសូត្រ (បុគ្គល ៤ ពួកក្នុងលោក)

ម្នាលភិក្ខុទាំងឡាយ បុគ្គល ៤ ពួកនេះ មាននៅក្នុងលោក។ បុគ្គល ៤ ពួក តើដូចម្តេចខ្លះ។

១. កោធគរុ ន សទ្ធម្មគរុ៖ គឺបុគ្គលជាអ្នកធ្ងន់ក្នុងសេចក្តីក្រោធ មិនធ្ងន់ក្នុងព្រះសទ្ធម្ម

២. មក្ខគរុ ន សទ្ធម្មគរុ៖ ជាអ្នកធ្ងន់ក្នុងសេចក្តីលុបគុណ មិនធ្ងន់ក្នុងព្រះសទ្ធម្ម

៣. លាភគរុ ន សទ្ធម្មគរុ៖ ជាអ្នកធ្ងន់ក្នុងលាភ មិនធ្ងន់ក្នុងព្រះសទ្ធម្ម

៤. សក្ការគរុ ន សទ្ធម្មគរុ៖ ជាអ្នកធ្ងន់ក្នុងសក្ការៈ មិនធ្ងន់ក្នុងព្រះសទ្ធម្ម។

ម្នាលភិក្ខុទាំងឡាយ បុគ្គល ៤ ពួកនេះឯង មាននៅក្នុងលោក។

១. សទ្ធម្មគរុ ន កោធគរុ៖ គឺបុគ្គលជាអ្នកធ្ងន់ក្នុងព្រះសទ្ធម្ម មិនធ្ងន់ក្នុងសេចក្តីក្រោធ

២. សទ្ធម្មគរុ ន មក្ខគរុ៖ ជាអ្នកធ្ងន់ក្នុងព្រះសទ្ធម្ម មិនធ្ងន់ក្នុងសេចក្តីលុបគុណ

៣. សទ្ធម្មគរុ ន លាភគរុ៖ ជាអ្នកធ្ងន់ក្នុងព្រះសទ្ធម្ម មិនធ្ងន់ក្នុងលាភ

៤. សទ្ធម្មគរុ ន សក្ការគរុ៖ ៤. ជាអ្នកធ្ងន់ក្នុងព្រះសទ្ធម្ម មិនធ្ងន់ក្នុងសក្ការៈ។

ម្នាលភិក្ខុទាំងឡាយ បុគ្គល ៤ ពួកនេះឯង មាននៅក្នុងលោក។

‘‘កោធមក្ខគរុ ភិក្ខុ, លាភសក្ការគារវា;

ន តេ ធម្មេ វិរូហន្តិ, សម្មាសម្ពុទ្ធទេសិតេ។

ភិក្ខុណាជាអ្នកធ្ងន់ក្នុងសេចក្តីក្រោធ និងសេចក្តីលុបគុណ ជាអ្នកធ្ងន់ក្នុងលាភសក្ការៈ ភិក្ខុទាំងនោះ រមែងមិនចម្រើនក្នុងព្រះសទ្ធម្មដែលព្រះសម្មាសម្ពុទ្ធទ្រង់ ត្រាស់សំដែងឡើយ។

‘‘យេ ច សទ្ធម្មគរុនោ, វិហំសុ វិហរន្តិ ច;

តេ វេ ធម្មេ វិរូហន្តិ, សម្មាសម្ពុទ្ធទេសិតេ’’តិ។

ភិក្ខុទាំងឡាយណា ជាអ្នកធ្ងន់ក្នុងព្រះសទ្ធម្ម នៅហើយផង នៅឥឡូវនេះផង ភិក្ខុទាំងនោះ រមែងចម្រើនក្នុងព្រះសទ្ធម្ម ដែលព្រះសម្មាសម្ពុទ្ធត្រាស់សំដែងហើយ។